Udhëheqësja e re e ekstremit të djathtë të Italisë, Giorgia Meloni, ka përdorur fjalimin e saj të parë për deputetët për të theksuar synimin e saj për të ndaluar anijet me emigrantët që kalojnë Mesdheun.
"Ne duhet të ndalojmë nisjet e paligjshme dhe trafikimin e qenieve njerëzore," - tha ajo. Meloni përsëriti premtimin e bërë gjatë fushatës për të ndaluar anijet që shkojnë në Itali nga Afrika e Veriut.
Për vite me radhë Italia ka qenë një qendër për emigrantët e parregullt që shkojnë drejt Evropës. Më shumë se 77 mijë persona kanë bërë kalimin shumë të rrezikshëm drejt Italisë këtë vit. 45-vjeçarja që drejton partinë Vëllezërit e Italisë erdhi në pushtet në krye të një koalicioni të krahut të djathtë.
"Ne nuk synojmë në asnjë mënyrë të vëmë në dyshim të drejtën e azilit për ata që ikin nga luftërat dhe persekutimet" - i tha ajo dhomës së ulët të parlamentit. "Gjithçka që duam të bëjmë në lidhje me emigracionin është të ndalojmë trafikantët të vendosin se kush mund të hyjë në Itali."
Ajo tha se ndjente peshën e të qenit liderja e parë femër e vendit të saj. Meloni përdori fjalën angleze "underdog" për të përshkruar veten. Kështu nderoi një gamë të gjerë grash italiane që sipas saj kishin shkuar para saj për të "thyer këtë tavan të fundit prej xhami".
Ajo u prit me ovacione dhe thirrje “Giorgia, Giorgia”. Qeveria Meloni u betua të shtunën. Më herët, ministri i ri i Brendshëm, Matteo Piantedosi, kërcënoi se do të mbyllte portet për 2 varkat e shpëtimit që transportonin qindra emigrantë, me argumentin se nuk po zbatonin rregullat. ©LAPSI.al
