Presidenti ukrainas Volodymyr Zelensky ka thënë se sulmet e Rusisë ndaj infrastrukturës energjetike të Ukrainës kanë për qëllim të krijojnë një vale të re refugjatësh, sipas CNN.
Duke folur në Këshillin Europian, Zelensky tha se “udhëheqja aktuale ruse ka urdhëruar që vetë sistemi energjetik të kthehet në një fushë beteje. Pasojat e kësaj janë shumë të rrezikshme, për të gjithë ne në Europë.”
“Sulmet nga raketat ruse dhe dronët iranianë kanë shkatërruar më shumë se një të tretën e infrastrukturës sonë energjetike”, tha ai.
“Për shkak të kësaj, për fat të keq, ne nuk mund të eksportojmë më energji elektrike për t’ju ndihmuar të ruani stabilitetin.”
“Rusia po provokon gjithashtu një valë të re migrimi të ukrainasve në vendet e BE-së. Sulmet e Rusisë kundër objekteve tona energjetike synojnë të krijojnë sa më shumë probleme me energjinë elektrike dhe ngrohjen në Ukrainë këtë vjeshtë dhe dimër dhe të bëjë që sa më shumë ukrainas të largohen për në vendet tuaja,” shtoi ai.
Zelensky pohoi gjithashtu se Rusia po krijonte baza për një katastrofë në shkallë të gjerë në jug të Ukrainës, me forcat ruse që po përpiqen të shkatërrojnë një digë kritike Dnipro në rajonin jugor të Khersonit, si dhe hidrocentralin ngjitur.
Diga dhe hidrocentrali kanë punuar me kapacitet shumë të reduktuar pasi forcat ruse morën në kontroll zonën në mars.
Forcat ukrainase janë rreth 40 kilometra (më shumë se 24 milje) në veri të digës. Gjatë katër muajve të fundit, ata kanë nisur disa sulme kundër urës që është pjesë e digës për të parandaluar përdorimin e saj nga ushtria ruse.
