Kryeministri Edi Rama ka reaguar për vdekjen e të riut Lear Kurti. Përpara fermerëve të Elbasanit, kreu i qeverisë u shpreh policia është sjellë në mënyrën më korrekte. Sipas tij, provë e profesionalizmit është pezullimi i efektivëve të patrullës ndërkohë që bëhen hetimet.
Rama tha se nuk ka pasur asnjë arsye të jashtme që mund të ketë shkaktuar vdekjen e 32-vjeçarit Kurti. Kreu i qeverisë u shpreh se opozita po përpiqet ta lidhë rastin me atë të Klodian Rashës. Rrjedhimisht sipas Ramës, ata duan të nxjerrin njerëzit në rrugë.
“Kanë që dje që akuzojnë policinë se ka vrarë një djalë të ri. Ndërkohë që në mënyrën më korrekte, serioze, dinjitoze, ka pezulluar personat që të mos jenë të përfshirë në asnjë lloj procesi…Është mjekësia ligjore që bën punën e vet. Nuk ka asnjë arsye që të ketë pasur arsye nga jashtë, të ketë qenë gjë e bërë me të keq. Të gjithë presim autopsinë, raportin mjeko-ligjor e me radhë. Cfarë qeniesh janë këta që u dalin njerëzve si gogolë në ekrane…E vrau policia sepse duan ta lidhin në psikologjinë e njerëzve me atë tmerrin e madh që ishte, të të ndjerit Klodian Rasha dhe duan të nxjerrin njerëzit rrugëve,” tha kryeministri Rama nga Elbasani.
