Megjithëse kreu i qeverisë shqiptare, Edi Rama mbajti një fjalë të gjatë në Asamblenë e Këshillit të Europës duket se nuk ka pasur jehonë në Beograd. Nga një vështrim i shpejtë që lapsi.al bëri në mediat kryesore serbe shihet se fjala e Ramës nuk ka zënë vend.
Pak e çuditshme nëse mendon që kreu i qeverisë shqiptare mbrojti luftën e UÇK-së dhe i konsideroi të pavërteta raportet për krime lufte. Nga mediat e mëdha serbe vetëm agjencia Tanjug ka një shkrim të shkurtër. Aty i është mëshuar faktit që Rama mohoi ekzistencën e krimeve gjatë luftës.
“Duke iu drejtuar sot Asamblesë Parlamentare të Këshillit të Evropës, Rama kritikoi rezolutën e vitit 2011 për tregtinë ilegale të organeve të personave të rrëmbyer në Kosovë. Ai vlerësoi se pretendimet e Del Ponte për përfshirjen e pjesëtarëve të UÇK-së në tregtinë e organeve bazohen në burime të dyshimta.
“Kjo akuzë bëri bujë nga Evropa deri në Australi. Pavarësisht se akuzat në Kosovë u mohuan kategorikisht. Pyetja më misterioze ishte se çfarë e pengoi prokuroren e fuqishme të hetonte më tej” – tha citon Tanjug kryeministrin e Shqipërisë .
Lajmi i Tanjug është marrë copy paste edhe nga “Blic” që i ka dhënë zë në të njëtin vend edhe deputetit dhe zëdhënësit të Partisë Popullore të Serbisë, Stefan Jovanoviq. Ai po merr pjesë në seancën e Asamblesë Parlamentare të KiE në Strasburg dhe e ka vlerësuar fjalimin e Ramës si “skandaloz”.
“Në vend që të përballet me krimet ndaj serbëve, të cilëve u janë hequr organet në “shtëpinë e verdhë” gjatë luftës dhe që autorët të dënohen, sot kryeministri i Shqipërisë u përpoq t’i paraqesë të gjitha si gënjeshtër” – tha Jovanoviq në një deklaratë me shkrim.
Ndërsa mediat e tjera kryesore kanë heshtur. ©LAPSI.al
LEXO EDHE: Një fjalim për të kthyer Thaçin në skenë
