Gjykata e Lezhës ka dënuar me 8 vite burg, 17 vjeçarin, Florian Përvathi i cili në janar vrau Lek Lekgjonajn për të marrë hakun e babait të tij. I riu akuzohet për veprën penale të “vrasjes për gjakmarrje” dhe të “armëmbajtjes pa leje”. Vrasja ndodhi në janar të këtij viti, në fshatin Manati. Pas krimit, 17 vjeçari u dorëzua në polici, ku deklaroi se e kishte kryer vrasjen për të marrë hakun e babait të tij që ishte vrarë nga Ndue Lekgjonaj, vëllai i Lek Lekgjonajt.
Për vrasjen e fqinjit të tij me armë zjarri, me 21 nëntor të vitit 2009, Ndue Lekgjonaj bëri vetëm 4 vite burg dhe prej vitesh jetonte në emigrim. Në vendimin e zbardhur të Gjykatës së Lezhës, dhënë më 26 korrik 2010, Lekgjonaj gjendet fajtor për akuzën e vrasjes me dashje dhe armëmbajtjes pa leje. Në vendim thuhet se Lekgjonaj akuzohet për dy vepra penale, ndërsa prokurori i shkarkuar tanimë nga vetingu, Agim Dalipi, ka kërkuar dënimin me vetëm 12 vite burg.
Pavarësisht dënimit minimal, trupa gjykuese i “fali” edhe rreth dy vite të tjera, duke e dënuar përfundimisht me 10 vite e 6 muaj burg. Në të njëjtën kohë, autori i vrasjes së Gjon Përvathit dhe plagosjes me makinë të djalit të tij, vetëm 14 vjeç në atë kohë, përfitoi edhe gjykim të shkurtuar, duke iu zbritur dënimi me 7 vite. Ndërsa ende nuk dihet se si përfitoi ulje të dënimit edhe të 7 viteve, ajo që dihet tanimë është se autori i vrasjes së babait të katër fëmijëve kreu vetëm 4 vite burg.
Sa i përket armës së siguruar për të kryer ekzekutimin, Florian Përvathi, zbuloi se ishte pajisur me pistoletë gjatë kohës që studionte për pikturë.
