Një 44-vjeçar është arrestuar nga policia e Durrësit. Ai u kap me armë zjarri pistoletë pa leje me vete. Sapo ka parë policinë, 44-vjeçari ka hyrë në lokalin e tij, me qëllim për të fshehur armën.
Shërbimet e Komisariatit të Policisë Durrës e arrestuan në flagrancë shtetasi B. R., banues në lagjen nr. 18, Durrës. Ai akuzohet për veprën penale "Mbajtja pa leje e armëve, armëve shpërthyese dhe i municionit".
"Ky shtetas sapo ka evidentuar shërbimet e Policisë, është futur në lokalin e tij dhe ka tentuar të fshehë armën e zjarrit që mbante me vete. Ndërhyrja në kohë e Policisë ka bërë të mundur që arma e zjarrit pistoletë, krehëri i saj dhe municioni luftarak, t’i gjenden dhe t’i sekuestrohen menjëherë 44-vjeçarit, gjatë kontrollit fizik të ushtruar ndaj tij," njoftoi policia.
Gjatë kontrollit fizik të arrestuarit iu gjetën dhe iu sekuestruan një armë zjarri pistoletë, krehëri i saj dhe municion luftarak.
Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
