Kryeministri Edi Rama dha pak detaje për takimin që zhvilloi në Pragë me homologun grek Kiriakos Mitsotakis. Duke folur për mediat shqiptare Rama tha se ende nuk ka dakordësi për çështjen e kufirit detar mes 2 vendeve.
“Do ulemi të flasim. Ky është një proces ligjor. Ka një sërë rregullash. Ka një sërë procedurash dhe ne do t’i respektojmë procedurat nga fillimi në fund sepse duhet të bëjmë shumë të qartë pozicionin tonë. Duhet të bëjmë shumë të qartë çfarë ne synojmë në këtë proces. Ai qëndrimi i unifikuar që kërkohet nga kjo gjykatë, për çfarë synon njëra palë dhe çfarë synon pala tjetër kërkon kohën e vet. Pra nuk kemi një konsensus mes palëve” – tha Rama.
Ndërsa mediat greke kanë zbardhur më shumë detaje nga takimi. “Protothema” shkruan se të dy liderët shkëmbyen mendime për të gjithë gamën e marrëdhënieve dypalëshe dhe zhvillimet rajonale. Rama dhe Mitsotakis konfirmuan vullnetin e tyre për thellimin e bashkëpunimit dypalësh.
“Protothema” citon pjesë nga njoftimi i qeverisë greke. Mitsotakis ka nënvizuar mbështetjen e vazhdueshme të Greqisë për rrugën europiane të Shqipërisë. Kjo, në përputhje me termat dhe kushtet e vendosura nga Këshilli Europian .
Një tjetër temë e diskutuar kanë qenë edhe efektet e krizës së Ukrainës në Ballkanin Perëndimor, por dhe nevoja për të ruajtur stabilitetin dhe për të forcuar sigurinë energjetike të rajonit .
“Kryeministri Mitsotakis nënvizoi interesin e vazhdueshëm të Athinës për mbrojtjen e të drejtave të pakicës kombëtare greke në Shqipëri, me theks të veçantë në sigurimin e të drejtave të tyre pronësore.
Ai iu referua edhe demarkacionit të zonave detare të dy vendeve dhe theksoi se dërgimi i çështjes në Gjykatën Ndërkombëtare të Drejtësisë në Hagë, siç është rënë dakord, do të forcojë më tej marrëdhëniet e mira fqinjësore duke shfrytëzuar potencialin e tyre të plotë” – citon gazeta Protothema. ©LAPSI.al
