Një 22-vjeçar është kapur në flagrancë duke transportuar 5 emigrantë të paligjshëm në Himarë. Pasi u pikas nga Policia, i riu ka tentuar të largohet, por aventura e tij nuk ka zgjatur shumë. I arrestuari, i identifikuar me inicialet E. Gj iu sekuestrua makina me të cilën po transportonte klandestinët, ndërsa tani do të përballet me drejtësinë.
Njoftimi i Policisë:
Nuk iu bind urdhrit të punonjësve të Policisë për të ndaluar automjetin me të cilin po transportonte 5 emigrantë të paligjshëm, vihet në pranga 22-vjeçari. Shërbimet e Komisariatit të Policisë Himarë, në bashkëpunim me Seksionin e Hetimit të Trafiqeve dhe Narkotikëve, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, në bazë të informacioneve policore, kanë organizuar dhe finalizuar me sukses operacionin policor “Five”, si rezultat i të cilit u ndalua shtetasi E. Gj., 22 vjeç, banues në Delvinë.
Gjatë operacionit, në aksin rrugor Qeparo–Kudhës, shërbimet e Policisë i kanë bërë shënjë për ndalim shtetasit E. Gj., por ai nuk i është bindur urdhrit për të ndaluar automjetin me të cilin po transportonte 5 emigrantë të paligjshëm dhe është larguar. Pas ndjekjes nga Policia u bë munduar kapja dhe arrestimi i shtetasit E. Gj., si dhe u sekuestrua automjeti me të cilin ai po transportonte emigrantët, kundrejt fitimit. Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme.
