Ish-ministri i Brendshëm, Saimir Tahiri, ka zhvendosur përballjen e tij me drejtësinë në Gjykatën e Elbasanit. Kjo pasi burgu i Lushnjes ku ndodhet ai gjendet nën juridiksionin e asaj gjykate.
Tahiri është dënuar me 3.4 vite burg nga Gjykata e Posaçme e Apelit.
Sipas të dhënave, ish-kreu i dikasterit të Brendshëm, përmes avokatëve të tij mbrojtës, i kërkon Gjykatës njohjen e dënimit të dhënë më datë 19 shator 2019 nga Gjykata e Shkallës së Parë. Në atë kohë, ai u dënua për shpërdorim detyre me 3 vite 4 muaj heqje lirie. Por Gjykata e pezulloi dënimin dhe e konvertoi në shërbim prove.
Ish-ministri pretendon se ai e ka zbatuar atë dënim duke mbajtur çdo ditë kontakte me shërbimin e provës, deri në dhënien e vendimit nga Apeli më 4 shkurt të këtij viti. Kjo Gjykatë rrëzoi dënimin me shërbim prove duke e dërguar në burg ish-ministrin. Seanca e parë në Gjykatën e Elbasanit do të mbahet më 10 tetor.
Tahiri do t’i kërkojë asaj njohjen e dënimit me 3 vite shërbim prove/ Dhe nëse kërkesa pranohet, ai do të përfitojë ulje të dënimit me burg për të paktën 1 vit e 6 muaj. Kërkesa do të shqyrtohet nga gjyqtari Elis Dine. Tahiri prej 8 muajsh po vuan dënimin në burgun e Kosovës në Lushnjë. Pasi u gjet fajtor për akuzën e shpërdorimit të detyrës. Në një tjetër përballje me drejtësinë, ish-ministri i Brendshëm, Saimir Tahiri, vijon betejën për pafajësi në Gjykatën e Lartë.
Lexo më tej: Berisha: Çfarë do ishte sot Saimir Tahiri pa antimafian italiane
