Kryetari i Partisë Demokratike, Sali Berisha tha se historia e lobimit rus do të vijojë. Nga foltorja e parlamentit ai nënvizoi se PD nuk ka marrë asnjë financim rus. Akuzoi kryeministrin Rama se mbylli dosjen në SPAK për të marrë peng Lulzim Bashën.
“Këtu në parlament ngrihet dhe sulmon opozitën. Flet për PD-në dhe financimet. PD nuk ka marrë kurrë asnjë financim rus. Nëse i ka marrë, i ka marrë Lulzim Basha. U them shqiptarëve kaq; PD u themelua si parti e interesit kombëtar dhe i ka qëndruar, rusëve dhe interesave strategjike në mënyrën më të fuqishme.
Fakti që dështuan në korridorin e jugut kur u vendos TAP-i është një nder i madh i Shqipërisë dhe qeverisë së saj. Edi Rama njeriu që e dinte se janë financime ruse dhe që i deklaroi Lulzim Bashës në 2018 se ke futur duart në xhepat rusë, bëri gjithçka ti mbyllë dosjen dhe ta marrë peng dhe për këtë ka fakte të pakundërshtueshme. Cili të dojë të marrë vendimin e gjykatës dhe të shikojë. Sa qesharak është hetimi i atij rasti” – tha Berisha.
“PD ka krijuar një Komision Hetimor dhe i kërkon përsëri Lulzim Bashës të tregojë cila është origjina e parave. Kush ja dha paratë. Ka një raport zyrtar. Por në bllokimin e hetimit të kësaj çështje, përgjegjësi kryesore ka Edi Rama. Ai ose e bllokoi për ta marrë peng Bashën, ose e bllokoi me urdhër të atyre të cilët i kanë dhënë paratë” – tha Berisha që në fund bëri edhe një paralajmërim për diçka të padëgjuar më parë.
“Ju them një gjë këtu. Ekziston një dosje në Mitrokinë. Ekziston dosja në Mitrokinë, të shohë pak Edi Rama se cilin do të gjejë në dosjen Mitrokinë, do të vazhdojë dosja ruse dhe këtu do të jemi”, - tha ai. ©LAPSI.al
