Rusia ka kryer sulme ajrore në qytetin e dytë më të madh ukrainas, Kharkiv. Sulmet gjatë natës goditën një stacion trenash. Aty shkaktuan ndërprerje të energjisë për më shumë se 18.000 restorante e banesa, thanë zyrtarët më 28 shtator.
Guvernatori i Kharkivit, Oleh Synehubov, tha se forcat ruse kanë goditur me raketa të llojit S-300. Raketa që janë armë të dizajnuara për mbrojtje ajrore, por shpesh përdoren edhe për të goditur infrastrukturat civile në qytetet ukrainase.
Shërbimi i emergjencave në rajonin e Kharkivit tha se shpërthimet kanë shkatërruar një trafo elektrike. Gjithashtu kanë goditur edhe një punëtori.
Autoritetet nuk kanë raportuar për viktima. Megjithatë kompania rajonale e energjisë elektrike tha se 18.500 konsumatorë në qarqet Shevçenkivski, Holodnogirski dhe Novobavarski, kanë mbetur pa furnizim me rrymë.
Sulmet në Kharkiv vijnë një javë pasi u kryen sulme të ngjashme në një stacion trenash dhe në ndërtesat rezidenciale.
Luftime të ashpra po ashtu po vazhdojnë në rajonin e Khersonit. Njoftimin e dha Ministria e Mbrojtjes së Britanisë në buletinin e përditshëm për luftën në Ukrainë.
Ministria britanike tha më 28 shtator se forcat ushtarake ruse në këtë zonë, të stacionuar në anën e djathtë të bregut të Lumit Dnipro, po sulmojnë pozicionet ukrainase.
Inteligjenca britanike tha po ashtu se Rusia po përdor forcat e saj për të vazhduar përpjekjet për të përparuar afër Bahmutit në Donbas. Përpjekje kjo që vazhdon pavarësisht se forcat e Moskës janë nën presion të madh në veri dhe jug të Ukrainës.
Luftimet e fundit vijnë teksa zyrtarët amerikanë thanë se Uashingtoni po përgatit një pako të re të ndihmës ushtarake për Ukrainën. Një ndihmë me vlerë prej 1.1 miliardë dollarësh.
SHBA-ja dhe shtetet e tjera perëndimore kanë ndihmuar me armë Ukrainën. Ndihmat nisen që kur Rusia nisi pushtimin e shtetit të saj fqinj më 24 shkurt.
