Një vajzë 17-vjeçare është marrë peng dhe është dhunuar fizikisht ditën e djeshme në Kavajë. Mësohet se e mitura është marrë me forcë nga dy të rinj, një 23-vjeçar dhe një tjetër 18-vjeçar. Të rinjtë morën peng vajzën, duke e mbajtur në një ambient që aktualisht nuk është në përdorim. Në këto ambiente ata e kanë dhunuar fizikisht. Menjëherë pas marrjes së informacionit, forcat e rendit kanë ndërhyrë duke liruar të renë. Ndërkohë policia njofton se janë arrestuar dy të rinjtë, të cilët ishin me banim në Peqin. Gjatë kontrollit fizik të 18-vjeçarit, u gjet një dorezë metalike (përforcues grushti). Kjo armë dyshohet të jetë përdorur në dhunimin e 17-vjeçares.
Nuk dihet ende shkaku i këtij veprimi, ndërsa policia ka marrë dëshminë e vajzës si edhe të dy pengmarrësve.
Njoftimi
Kavajë
Falë bashkëpunimit me qytetarët dhe ndërhyrjes në kohë nga shërbimet e Policisë, arrestohen në flagrancë 2 shtetas. Ata i hoqën lirinë një shtetaseje dhe ushtruan dhunë ndaj saj.
Shërbimet e Komisariatit të Policisë Kavajë, pas marrjes së njoftimit nga qytetarët se dy shtetas i kishin hequr lirinë një shtetaseje, menjëherë kanë organizuar punën për kapjen e autorëve të dyshuar.
Falë veprimeve profesionale policore nga specialistët për Hetimin e Krimeve në Komisariatin e Policisë Kavajë, janë arrestuar në flagrancë, në një kohë rekord, shtetasit:
– A. D., 23 vjeç, banues në Peqin, për veprat penale “Heqja e paligjshme e lirisë”, “Kanosja” dhe “Plagosja e lehtë me dashje”, të kryera në bashkëpunim;
– A. H., 18 vjeç, banues në Peqin, për veprat penale “Heqja e paligjshme e lirisë”, “Kanosja”, “Plagosja e lehtë me dashje”, të kryera në bashkëpunim dhe “Prodhimi, mbajtja, blerja apo shitja pa leje e armëve të ftohta”.
Këta shtetas, në bashkëpunim me njëri-tjetrin, ditën e djeshme, i kanë hequr lirinë një shtetaseje 17 vjeçe, duke e mbajtur në një ambient që aktualisht nuk është në përdorim, si dhe kanë ushtruar dhunë ndaj saj. Gjatë kontrollit fizik ndaj shtetasit A. H., shërbimet e Policisë gjetën dhe sekuestruan, në cilësinë e provës materiale, një dorezë metalike (përforcues grushti).
Materialet i kaluan Prokurorisë, për veprime të mëtejshme procedurale.
