Policia e Durrësit njofton se ka goditur pesë raste të mallrave kontrabandë. Në njoftimin e bluve, bëhet me dije se janë evidentuar dhe goditur mundësi të tregtimit të mallrave të kontrabanduara. Po ashtu, njoftohet se janë proceduar penalisht pronarët e dyqaneve. Sakaq, autoritetet bëjnë me dije se janë sekuestruar 2 kg flori. Ndër të tjera në dyqane janë konfiskuar veshje të ndryshme dhe pajisje elektrike.
Njoftimi:
Durrës-Kontrolle të pandërprera në çdo subjekt tregtar për të parandaluar, evidentuar dhe goditur paligjshmëritë në fushën e krimit ekonomik. Finalizohet plani operacional i koduar “Five”, i zhvilluar nga Sektori për Hetimin e Krimeve Ekonomiko-Financiare të DVP Durrës. Evidentohen dhe goditen 5 raste të tregtimit të mallrave të kontrabanduara, procedohen penalisht pronarët e dyqaneve.
Sekuestrohen rreth 2 kg flori, veshje të ndryshme dhe pajisje elektrike, të dyshuara të kontrabanduara.
Të ngjashme: Shiste mallra të kontrabanduara, arrestohet 47-vjeçari në Korçë
Specialistët e Sektorit për Hetimin e Krimeve Ekonomiko-Financiare të DVP Durrës, bazuar dhe në informacionet e marra në rrugë operative, organizuan dhe finalizuan planin operacional policor të koduar “Five”, në kuadër të të cilit u proceduan penalisht shtetasit:
-G. P., M. B., H. L., E. N. dhe G. B., të pestë banues në Durrës. Në dyqanet respektive tregtonin aksesorë floriri, veshje të ndryshme ose pajisje elektrike, të cilat dyshohet se janë të kontrabanduara në vendin tonë.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme, për veprat penale “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Shkelja e të drejtave të pronësisë industriale” dhe “Fshehja e të ardhurave”.
