Reshjet e shiut dhe shtrëngatat kanë përfshirë gjatë ditës së sotme të gjithë territorin e vendit. Policia e Shtetit ka apeluar për të gjithë drejtuesit e automjeteve dhe motomjeteve që të tregojnë kujdes. Në njoftim rikujtohet reduktimi i shpejtësinë dhe respektimi i rregullave të qarkullimit rrugor. Në apelin e policisë thuhet se ka prezencë të lagështirës pothuajse në të gjitha rrugët dhe të inerteve në disa segmente të akseve rrugore. Nga drejtuesit e mjeteve dhe të motomjeteve kërkohet të mos kryejnë parakalime të gabuara si dhe të ruajnë distancën gjatë qarkullimit. Theksohet se në të gjitha akset rrugore kryesore, në qendrat urbane dhe akset kryesore rurale, janë prezente shërbimet e policisë rrugore.
“Të gjithë përdoruesit e rrugës të ndjekin udhëzimet e punonjësve të Policisë Rrugore e të autoriteteve të tjera shtetërore dhe në rast të bllokimit të rrugës, drejtuesit e mjeteve të qëndrojnë në radhë deri në zhbllokimin e saj.
Policia Rrugore është në kontakt të pandërprerë me firmat kontraktore të mirëmbajtjes së rrugëve, për pastrimin e inerteve në disa segmente rrugore. Policia Rrugore sqaron të gjithë drejtuesit e mjeteve që ndëshkohen me masa administrative, për shkelje të ndryshme, se mund t’i shlyejnë masat administrative pranë çdo filiali të Postës Shqiptare ose në filialet e bankave të nivelit të dytë”, thekson policia.
