Shtëpia e Bardhë njoftoi një paketë sigurie prej 600 milionë dollarësh për Ukrainën të enjten, duke i ofruar ushtrisë ukrainase një raund tjetër ndihme gjatë kundërsulmimit të saj kundër forcave ruse.
Sipas një deklarate nga Sekretari i Shtetit Antony Blinken, pajisjet do të nxirren nga stoqet dhe inventarët ekzistues të SHBA-së dhe do të përfshijnë armë, municione dhe pajisje shtesë, bën me dije CNN.
“Së bashku me aleatët dhe partnerët tanë, ne po dorëzojmë armët dhe pajisjet që forcat e Ukrainës po përdorin në mënyrë kaq efektive, ndërsa vazhdojnë kundërsulmin e tyre të suksesshëm kundër pushtimit rus”, tha Blinken.
Lexo edhe:
Sekretari i NATO-s: Ukraina duhet të marrë më shumë armatime të rënda
Paketa përfshin municion shtesë për sistemin HIMARS, të cilin Ukraina e ka përdorur për të goditur qendra të shumta logjistike ruse, poste komanduese dhe depo municionesh. Ajo përfshin gjithashtu dhjetëra mijëra fishekë artilerie konvencionale 105 mm, 1000 fishekë preciziteti 155 mm dhe sisteme kundër dronëve. Me ardhjen e dimrit, Shtetet e Bashkuara po ofrojnë gjithashtu pajisje për motin e ftohtë dhe më shumë pajisje ndriçuese për natën.
Një javë më parë, Pentagoni njoftoi një tjetër paketë prej 675 milionë dollarësh, e cila përfshinte municione shtesë për HIMARS-in, si dhe dhjetëra mijëra fishekë artilerie.
