Tetë të dyshuar dolën në gjyq këtë të hënë për sulmin e korrikut 2016 në qytetin mesdhetar francez të Nicës, ku një islamist radikal vrau 86 persona, duke ngarë një kamion në mijëra vendas dhe turistë që festonin festën kombëtare të Francës.
Sulmuesi, një 31-vjeçar tunizian i quajtur Mohamed Lahouaiej-Bouhlel, u qëllua për vdekje nga Policia pas më shumë se katër minutash tërbim në sheshin bregdetar të Promenade des Anglais. Shtatë burrat dhe një grua që do të dalin në gjyq në Paris akuzohen për krime dhe nisin që nga njohja e qëllimeve të autorit të masakrës e deri tek ofrimi i mbështetjes logjistike dhe furnizimi me armë.
AKUZAT
Tre të dyshuar akuzohen si anëtarë të “shoqatës terroriste”, ndërsa pesë janë duke u gjykuar për “trafik armësh”. Disa nga të pandehurit hipën me sulmuesin në të njëjtin kamion në Nice vetëm disa ditë para sulmit, ndërsa të tjerët e pajisën me armë, thonë prokurorët. Ata u akuzuan të gjithë fillimisht si “bashkëpunëtorë” në sulm, por akuzat u hodhën poshtë gjatë katër viteve të hetimeve gjyqësore. Dy personat e gjykuar janë me shtetasi të dyfishtë francezotuniziane, ndërsa dy të tjerë janë tunizianë dhe katër janë nga Shqipëria.
Një i dyshuar i nëntë në këtë rast ka kryer vetëvrasje në paraburgim në qershor 2018. Prokurorët kërkojnë dënime me burg që variojnë nga 5 vjet deri në burgim të përjetshëm. Gjyqi njëmujor në Gjykatën Speciale të Assizes në Paris është cilësuar si një “moment përkujtimor” nga avokatët. Ai do të zgjasë deri në dhjetor, ndërsa midis atyre që do t’i drejtohen Gjykatës, do të jetë edhe ish-Presidenti francez, François Hollande. Gjyqi do të zhvillohet në Pallatin historik të Drejtësisë në Paris, në të njëjtën gjykatë të ndërtuar me qëllim ku u zhvilluan seancat dëgjimore të sulmeve të nëntorit 2015, dhe një vend i posaçëm është ngritur në Nice për të lejuar viktimat të ndjekin procedurat përmes një transmetimi të drejtpërdrejtë.
SULMI
Më 14 korrik 2016, qindra mijëra njerëz anembanë Francës mblidhen për të festuar Ditën e Bastiljes. Në Nice, mijëra banorë dhe turistë u mblodhën në “Promenade des Anglais” për të parë shfaqjen vjetore të fishekzjarrëve. Tuniziani Mohamed Lahouaiej-Bouhlel, i cili jetonte në të njëjtin qytet dhe ishte shofer transporti, atë ditë po ngiste një kamion të bardhë drejt turmave, pikërisht kur mbaroi shfaqja e fishekzjarrëve.
Ai e futi qëllimisht kamionin 19 tonësh në trotuar me shpejtësi të madhe dhe kaloi me zigzage përgjatë rrugës për gati dy kilometra, duke goditur këmbësorët. Tetëdhjetë e gjashtë njerëz u vranë dhe më shumë se 400 të tjerë u plagosën në tërbim. Ndërsa kamioni po i afrohej një hoteli luksoz, policia franceze ndërhyri duke qëlluar për vdekje 31-vjeçarin. Dy ditë më vonë, sulmi u mor përsipër nga anëtarët e të ashtuquajturit grupi ekstremist Shteti Islamik (ISIS). Hetuesit thonë se sulmuesi ishte frymëzuar nga propaganda e grupit ekstremist, por nuk kanë gjetur asnjë provë për një lidhje të drejtpërdrejtë.
