Një deklaratë e bërë nga kryeministri shqiptar, Edi Rama, në forumin e Bledit në Slloveni, ka sjellë reagimin e ashpër të Bullgarisë.
Gjatë këtij forumi, Rama deklaroi se Bullgaria ka bllokuar integrimin e Shqipërisë për tetë vite. Por kjo deklaratë cilësohet jo vetëm një shpifje nga ana e Ministrisë së Jashtme bullgare, por edhe një nxitje urrejtje ndaj Bullgarisë dhe BE-së.
Për më tepër, ky vend deklaron se do ketë një reagim zyrtar në përputhje me ligjet e BE-së.
“Në lidhje me deklaratën e re, të paprovokuar prej nesh, një tjetër deklaratë sinqerisht anti-bullgare e kryeministrit shqiptar Edi Rama, i cili deklaroi gjatë forumit të Bledit më 29-30 gusht të viti, në mënyrë të rreme se Bullgaria ka bllokuar fillimin e negociatave të BE-së me Shqipërinë për 8 vite.
Ministria e Jashtme hedh poshtë këto deklarata me vendosmëri si të papranueshme dhe të pahijshme për sjelljen e një kryeministri të një vendi kandidat për anëtarësimin në BE”, thuhet në deklaratë.
“Ministria e Jashtme e ka shprehur tashmë qëndrimin e saj në lidhje me retorikën antibullgare të Edi Ramës, e cila është kthyer në një refren të përhershëm të fjalimit të tij politik. Por tani ajo është e kombinuar me një orientim antieuropian dhe një përpjekje për të poshtëruar mekanizmat e procesit evropian.
Deklaratat e tij zbulojnë keqkuptime rreth kuptimit politik të procesit të vendosjes së marrëdhënieve në rajon në binarët europianë. Është e qartë se bëhet fjalë ose për mungesë aftësisht për komunikim evropian ose për një nxitje të qëllimshme të ndjenjave anti-europiane,” thuhet në reagimin e ashpër.
“Bullgari rezervon të drejtën e saj të reagojë në mënyrën e duhur ndaj sjelljes së kryeministrit shqiptar, duke ndjekur parimet e së drejtës ndërkombëtare dhe evropiane,” përfundon qëndrimi i Ministrisë së Jashtme bullgare.
