Podcasti i Dukeshës së Sussex-it kryesoi në listat e Spotify në gjashtë tregje në mbarë botën, duke përfshirë SHBA-në dhe Britaninë e Madhe.
"Archetypes" e Meghan Markle është aktualisht më popullor se "The Joe Rogan Experience", i cili në SHBA është vazhdimisht podkasti më i dëgjuar në Spotify.
"Archetypes", i publikuar të martën ekskluzivisht në Spotify, është numri 1 në listat e podkasteve të transmetuesit për SHBA, Kanada, MB, Irlandë, Australi dhe Zelandën e Re. Episodi i javës së ardhshme do të shfaqë një bisedë midis Markle dhe Mariah Carey.
Në episodin e premierës, Markle flet me Serena Williams për standardet e dyfishta me të cilat përballen gratë kur etiketohen si "ambicioze" dhe efektin që kjo ka në aspekte të tjera të jetës së tyre, si dhe për mënyrën se si ato perceptohen. Episodi paraqet gjithashtu Dr. Laura Kray, një eksperte kryesore për gjininë në vendin e punës dhe mënyrën sesi këto sterotipe ndikojnë tek ne.
Në "Archetypes", Meghan, fton komentatorët kulturorë, historianët dhe mendimtarët bashkëkohorë që të thellohen në origjinën e stereotipeve për gratë. Emisioni prodhohet nga Meghan dhe Archewell Audio i Princit Harry në partneritet me Gimlet Media të Spotify.
Archewell Audio nënshkroi për herë të parë marrëveshjen me Spotify në fund të vitit 2020, me misionin e "prodhimit të programeve që argëtojnë audiencat në mbarë botën", si dhe "të vë në qendër këndvështrime dhe zëra të ndryshëm" dhe "të ndërtojë komunitetin përmes përvojës së përbashkët, tregimeve dhe vlerat.”
Meghan dhe Princi Harry u martuan në maj 2018. Çifti kanë dy fëmijë, Archie dhe Lilibet ("Lili"). /Lapsi.al
