Ditët e fundit të gushtit kanë shënuar një fluks të jashtëzakonshëm të hyrjeve në Shqipëri të shtetasve të Kosovës me destinacion bregdetin shqiptar. Radhë kilometrike janë vërejtur që në orët e para të mëngjesit të së shtunës në segmentin Morinë -Kukës të Rrugës së Kombit, tek ura e Drinit të Zi. Mijëra qytetarë nga Kosova me automjetet e tyre dhe autobusë iu drejtuan bregdetit shqiptar.
Sipas të dhënave nga autoritetet kufitare të shtunën paradite kanë kaluar pikën kufitare të Morinës, rreth 40 mijë shtetas të Kosovës ndërsa në 25 ditët e para të gushtit kanë hyrë në Shqipëri mbi 400 mijë shtetas të Kosovës.
Kujtojmë se në pikën e përbashkët kufitare Shqipëri-Kosovë nuk ka kontrolle për qytetarët që kalojnë në të dyja vendet, kjo për shkak të marrëveshjes mes dy qeverive për të lehtësuar lëvizjen e qytetarëve. Marrëveshja mes dy shteteve ka mundësuar që deri më 30 shtator për çdo fundjavë dhe festë zyrtare, qytetarët të mos regjistrohen nga Policia e Kosovës dhe Shqipërisë.
