Politika shqiptare ka përshëndetur marrëveshjen mes Kosovës dhe Serbisë, me ndërhyrjen e SHBA dhe Bashkimit Europian, për dokumentet. Kryeministri i vendit Edi Rama e ka cilësuar si një lajm të bukur që mes palëve ka mbizotëruar dialogu. Po ashtu, kryeministri ka shtuar se uron që ky dialog të kalojë në një nivel të ri, pa humbur kohë.
'Lajm i bukur zgjidhja me dialog e çështjes së lëvizjes së lirë mes Serbisë e Kosovës, e bashkë me urimet për të dy palët uroj që ky zhvillim ta çojë dialogun në një nivel të ri, për të mos humbur kohë dhe energji pafund në arritjen e gjërave kaq thjeshtësisht logjike sa kjo sot'- shkruan Rama.
Edhe ministrja e Jashtme Olta Xhacka ka reaguar pas arritjes së marrëveshjes. Ajo e konsideron një lajm të mirë jo vetëm për dy shtetet, por për të gjithë rajonin teksa ka falënderuar dhe BE-në lehtësimin e dialogut.
"Një lajm shumë i mirë për rajonin. Kosova dhe Serbia kanë një marrëveshje nga e cila përfitojnë si shqiptarët ashtu edhe serbët. Dialogu është gjithmonë rruga. Urime të dy liderëve dhe mirënjohje BE për lehtësimin e dialogut", shkruan ministrja në Twitter.
