Mbetjet e atij që mund të jetë dinosauri më i madh i zbuluar ndonjëherë në Evropë, po zbulohen në një kopsht portugez. Skeleti i fosilizuar i një sauropodi u zbulua në qytetin qendror të Pombal në vitin 2017, kur një burrë filloi të ndërtonte shtëpinë e tij.
Sauropodët ishin më të mëdhenjtë nga të gjithë dinosaurët dhe kafshët më të mëdha tokësore që kanë jetuar ndonjëherë. Ata kishin qafë dhe bisht të gjatë, hanin bimë dhe ecnin me 4 këmbë.
Në fillim të këtij muaji, paleontologët nga Portugalia dhe Spanja zbuluan pjesë të shtyllës kurrizore dhe brinjëve të një sauropodi të mundshëm brachiosaurid që sugjeron se zvarraniku i madh ishte rreth 12 metra i gjerë dhe 25 metra i gjatë.
Skeleti është gjetur në shkëmbinjtë sedimentarë të Jurasikut të Sipërm, duke sugjeruar se është rreth 150 milionë vjet i vjetër. Skeleti i gjetur në pozicionin ku ndoshta ai ka vdekur tani po studiohet nga një ekip ndërkombëtar kërkimor.
Për shkak të pozicionimit relativisht të paprekur të skeletit, paleontologët që punojnë në gërmime shpresojnë se ka më shumë prej tyre që ata ende nuk kanë gjetur.
"Nuk është e zakonshme të gjesh të gjitha brinjët e një kafshe si kjo, e lëre më në këtë pozicion, duke ruajtur pozicionin e tyre origjinal anatomik," - tha Elisabete Malafaia, studiuese postdoktorale në Fakultetin e Shkencave të Universitetit të Lisbonës. ©LAPSI.al
