Sekretarja për Marrëdhëniet me Publikun, Silva Caka në një konferencë për mediat ka deklaruar se Partia e Lirisë, ka depozituar në SPAK 50 dokumente të cilat i ka bërë publike në deklaratat e strukturës Antikorrupsion.
Caka deklaroi se SPAK është vënë në dijeni sot sesi kompania koncensionare e inceneratorit të Tiranës, Integrated Energy BV SPV shpk, i ka dhënë një hua prej 500.000 euro një punonjësi e më pas i ka shitur dhe një tokë në vlerë 19.550.000 lekë.
Sipas saj, më pas po ky punonjës i cili konsultohej nga kompania e Stela Gugalles, Consulting Se Partners aplikon dhe shpallet fitues i një Granti pranë AZHBR me fonde të Bashkimit Evropian në vlerën 310.000 euro.
“Sigurisht nuk mbaron këtu sepse po i njëjti punonjës na del dhe pronar kompanie ne Mal të Zi e më pas dhe administrator me prokurë të posaçme i Integrated Energy BV dhe i një kompanie tjetër fiktive të krijuar nga kjo ORGANIZATE KRIMINALE”, u shpreh ajo ndërsa shtoi më tej se Partia e Lirisë vuri në dijeni SPAK dhe “për dokumentet e firmosur nga Arben Kacorri(kryetari i njësisë së zbatimit të projektit) i cili kujtohej pas një viti të kërkonte informacion për koncensionin e Fierit dhe pse Ministria e Financave dhe Ekonomisë gjatë inspektimit kishte konstatuar shkelje të rënda” tha Caka.
