Greqia i është bashkuar vendeve të tjera të Bashkimit Evropian për të kundërshtuar planin e Brukselit për të ulur konsumin evropian të gazit me 15 për qind për të kompensuar një rënie në furnizimet ruse.
“Qeveria greke, në parim, nuk e miraton propozimin e Komisionit Evropian për të ulur konsumin e gazit natyror me 15 për qind”, tha zëdhënësi i qeverisë, Janis Ekonomou.
Dje, Komisioni Evropian kërkoi nga njëzet e shtatë evropianët që të ulin vullnetarisht konsumin e gazit me 15 për qind për tetë muajt e ardhshëm, ndërsa propozoi masa për të përballuar ndërprerjen e mundshme të furnizimeve ruse me atë energji.
Sipas atij plani, i cili duhet të diskutohet në Këshillin Evropian më 26 korrik, parashikohet që çdo vend të bëjë të pamundurën për të ulur konsumin e gazit me të paktën 15 për qind nga mesatarja e pesë viteve të fundit nga gushti i këtij viti deri në mars të vitit të ardhshëm, raportojnë mediat ndërkombëtare.
Reduktimet fillestare do të ishin vullnetare. KE-ja ka kërkuar gjithashtu fuqinë për të futur reduktime të detyrueshme në të gjithë BE-në, në rast se “ka një rrezik të konsiderueshëm të mungesave serioze të gazit ose kërkesës jashtëzakonisht të lartë” për produktin energjetik.
Në kundërshtim me këtë plan, Greqia iu bashkua qëndrimit të shprehur zyrtarisht nga Portugalia dhe Spanja.
Ministri grek i Energjisë, Kostas Skrekas tha për radion lokale se Greqia po bashkohet me vendet anëtare që kundërshtojnë propozimin e Brukselit dhe përmendi Italinë, Spanjën, Portugalinë, Francën, Maltën dhe Qipron.
Ministri shpjegoi se duke ditur se 70 për qind e gazit që importon Greqia përdoret për prodhimin e energjisë elektrike, një ulje e tillë do të çonte në ndërprerje në furnizimin e familjeve dhe kompanive.
Ai tha se Greqia ka marrë tashmë një sërë masash për të kufizuar konsumin e saj të gazit, i kërkoi grupit publik PPC të dyfishojë prodhimin e linjitit dhe lë opsionin për të kaluar pesë termocentrale me gaz në naftë nëse është e nevojshme.
