Drejtori i postës së Dibrës, Ilir Vraniçi dhe shefi i zyrës Xhevdet Doda janë arrestuar këtë të premte për shpërdorim detyre. Mësohet se një urdhër arrest është firmosur edhe për punonjësin e postës Gazmir Hasi, i cili akuzohet për vjedhje duke shpërdoruar detyrën dhe falsifikim dokumentesh. Ky person sipas hetimeve ka vjedhur pensionet e qytetarëve, rreth 6 milion lekë (të rinj). Hasi ka mundur t’i shpëtojë policisë, pasi ende nuk është arrestuar. Dy shefat e tij, drejtori i postës dhe shefi i zyrës akuzohen se nuk e kanë pikasur vjedhjen, edhe pse në dokumentacionet e plotësuara nga Hasi ka parregullsi. Sipas hetimeve ata kanë pasur dijeni për veprimet e vartësit te tyre.
E gjitha parregullsia, sipas veprimeve hetimore të kryera, dyshohet se ka ndodhur në periudhën janar-maj të këtij viti.
