Prokuroria e Sarandës ka sekuestruar një sipërfaqe prej 679 m2 tokë truall në zonën Turizëm-Kanal i Çukës, e cila ishte regjistruar në shkelje të ligjit. Prokurori Kledian Llaho ka avancuar në hetimet ndaj ish-Drejtuesve dhe zyrtarëve të ASHK Sarandë dhe ka bërë kërkesën për sekuestrim. Trualli i sekuestruar ndodhet në zonën “Turizëm – Kanali i Ccukës” dhe pronësia ishte rregjistruar në emër të dy biznesmenëve nga Saranda, të cilët aty kishin ngritur biznes.
Ky sekuestrim është në kuadër të procedimit penal 297 të vitit 2021 ku në 24 mars u arrestuan 4 zyrtare dhe ish-zyrtarë të ASHK Sarandë dhe u shpall në kërkim ish-drejtoresha e institucionit. Sekuestrimi i sotëm vjen pas sekuestrimit të 9920 m2 truall në 2 qershor me urdhër të Prokurorit Llaho, të tjetërsuar me dokumenta të falsifikuar dhe të regjistruar më pas në emër të 11 personave private.
