Presidenti i Republikës Ilir Meta duket se papritur i ka qetësuar marrëdhëniet me Ambasadën e Shteteve të Bashkuara të Amerikës. Kujtojmë se vetëm 1 vit më parë Meta, para zgjedhjeve të 25 prillit, Meta arriti deri aty sa të nxirrte edhe SMS private që kishte shkëmbyer me ambasadoren Yuri Kim.
Por tashmë duket se diçka ka ndryshuar ...ose të paktën kështu duket.
Kreu i shtetit, që pas pak ditësh do të dorëzojë detyrën për shkak të përmbushjes së mandatit u shfaq mjaft i qeshur në krah të ambasadores Kim në ceremoninë me rastin e 246-vjetorit të Pavarësisë së SHBA. Në një postim në rrjetet sociale, Meta thotë se ishte “kënaqësi të merrte pjesë së bashku me miq të Shteteve të Bashkuara të Amerikës, në pritjen e organizuar nga Ambasada e SHBA në Tiranë”.
Meta thotë se jemi “krenarë për aleancën tonë strategjike dhe për marrëdhëniet e shkëlqyera mes dy popujve tanë, që meritojnë të zhvillohen më tej.
Gjithmonë pranë njëri-tjetrit në promovimin dhe mbrojtjen e vlerave të përbashkëta të lirisë, demokracisë dhe paqes” – shkruan Meta që ka publikuar edhe fjalimin që ka mbajtur në këtë ceremoni.
“Amerika, ka qenë dhe mbetet një burim frymëzimi për të gjithë shqiptarët dhe për të gjitha kombet e tjera që aspirojnë për parimet universale të demokracisë, lirive dhe të dinjitetit njerëzor” – tha ai në fjalën e tij.
Pas 24 korrikut Meta do të rikthehet në politikën aktive dhe në krah do të ketë ish-kryeministrin Sali Berisha që dukshëm nuk ka marrëdhënie kaq të mira sa Meta me SHBA-të . ©LAPSI.al
