Një shpërthim me lëndë plasëse është vendosur mëngjesin e sotëm në lokalin e reperit të njohur, Noizy. Raportohet se nga shpërthimi janë dëmtuar xhamat në dy katet e ndërtesës së lokalit.
E gjithë ngjarja ka ndodhur rreth orës 4 të mëngjesit në Durrës.
Telashet për Noizy-n mesa duket nuk paskan fund! Vetëm dy ditë më parë, Noizy pati një konflikt me Kleviol Ahmetin, i njohur ndryshe si Cllevio.
Madje, videoja e sherrit u bë virale në rrjet ku shihej Noizy teksa godiste Cllevion së bashku me miqtë e tij.
Në njoftimin e policisë thuhet: “Më datë 08.06.2022, rreth orës 04:24, në lagjen Nr.13, në një ambient (butik rrobash) të marrë me qira nga shtetasi B.R., ka shpërthyer një sasi lënde eksplozive. Si pasojë ka vetëm dëme materiale. Grupi hetimor nën drejtimin e Prokurorisë vijon hetimet për zbardhjen e ngjarjes, identifikimin e kapjen e autorit/ve”.
Kujtojmë që lidhur me sherrin, Noizy bëri një reagim dje në Instagram, ku ndër të tjera shkroi se askush nuk duhet t’ia marrë mirësjelljen e tij për dobësi.
“Mos ma merr mirësjelljen tim për dobësi, gëzoj respekt nga e gjithë bota dhe shpeshherë anashkaloj njerëz pa tru dhe moral. Por kjo s’do të thotë asnjë moment që mund ta teprosh deri në pikën ku ti kushdo qofsh të ofendosh familjen time ose familjarët e rrethit tim, jam djalë me tradita dhe zakone shqiptari. Ju lutem mos e harroni kurrë këtë gjë. Jeta vazhdon”, shkruante Noizy.
