Liam Payne duket se është penduar për disa nga deklaratat që ka bërë për ish-kolegun e grupit One Direction, Zayn Malik. Pasi u kritikua ashpër nga fansat sepse tha se nuk i pëlqen Malik, Payne dëshiron të qetësojë situatën.
"Njerëz, unë normalisht nuk do t’i komentoja këto gjëra, por kur bëhet fjalë për familjen, është e vështirë ta injoroni," shkroi këngëtari 28-vjeçar në Twitter, duke iu referuar intervistës së tij në podcastin "Impaulsive" të Logan Paul. "Ata përmendën një incident të veçantë që përfshin Zayn, të cilit unë iu përgjigja, por duke e dëgjuar mbase nuk e artikulova veten aq mirë sa duhej. Po thosha se gjithmonë do të ketë gjëra për të cilat nuk pajtohemi, por unë do të jem gjithmonë, gjithmonë në anën e tij. Kështu është familja. Zayn është vëllai im dhe unë do të qëndroj pranë tij përgjithmonë.”
Rikujtojmë se gjatë intervistës së tij, Payne tha:
"Ka shumë arsye pse nuk më pëlqen Zayn dhe ka shumë arsye pse unë do të jem gjithmonë, gjithmonë në anën e tij."
Payne, me sa duket, po i referohej një zënke të shtatorit 2021, në të cilën Malik u akuzua se e kishte goditur nënën e të dashurës së atëhershme Gigi Hadid, Yolanda Hadid. Këngëtari e ka mohuar pretendimin.
“Unë nuk jam dakord me asnjë nga veprimet e tij. Unë nuk mund të përgëzoj disa nga gjërat që ai ka bërë. Unë nuk mund të jem në anën e tij për këtë," vazhdoi Payne në podcast.
Duke qenë se anëtarët e One Direction, përfshirë Harry Styles dhe Niall Horan, kanë refuzuar të diskutojnë për jetën personale të ish-shokëve të tyre të grupit në intervistat e mëparshme, fansat ishin të indinjuar që Payne po fliste kaq publikisht për Malik.
