Kalush Orchestra, grupi ukrainas që fitoi Eurovision-in, do të nxjerrë në ankand kupën për t'i dhuruar më tej paratë në një fond bamirësie për të ndihmuar ushtrinë dhe Ukrainën.
Ky lajm u njoftua gjatë një konference nga udhëheqësi i grupit Oleh Psiuk.
"Ne planifikojmë të nxjerrim statujën tonë në ankand dhe t'i dhurojmë të gjitha paratë për një fond bamirësie që ndihmon Forcat e Armatosura dhe Ukrainën. Shumë njerëz tashmë po dhurojnë nga jashtë dhe ndoshta shumë të tjerë do të ofrojnë mbështetjen e tyre. Dhe kjo, sipas mendimit tonë, do të jetë gjëja që i motivon ata. Mendojmë se do të jetë e dobishme për Ukrainën", u shpreh artisti.
Në lidhje me zgjedhjen e platformës së ankandit dhe shumën që grupi kërkon të mbledhë, Psiuk tha se do të vendoset në të ardhmen e afërt.
"Do të doja të shihja një shumë të madhe, por nuk dua të përmend ndonjë numër. Do të shohim," shtoi lideri i grupit.
Gjithashtu gjatë konferencës, Orkestra Kalush falënderoi të gjithë për mbështetjen që ndjeu ekipi i tyre, si midis konkurrentëve ashtu edhe gjatë një televotimi.
"Dëshiroj të shpreh mirënjohjen time për të gjithë njerëzit që na mbështetën - ukrainas, diasporë dhe qytetarët e vendeve të tjera. Ky është një hap dhe fitore shumë e rëndësishme për Ukrainën. Jam i lumtur që arrita të përcjell lajme kaq të mira pasi nuk ka aq shumë prej tyre, dhe unë tashmë mund të shoh se si inkurajoi të gjithë njerëzit tanë, kështu që jam i lumtur të kuptoj se të gjitha këto përpjekje nuk ishin të kota, "tha Psiuk./Lapsi.al
