Dy persona kanë mbetur të plagosur ditën e sotme pas një sherri me thika në Tiranë. Agresori 41-vjeçar nga Vora ka goditur për motive të dobëta me mjet prerës dy të plagosurit, të cilët ndodhen në spital jashtë rrezikut për jetën.
“Shërbimet e Komisariatit të Policisë Nr. 6, pas marrjes së njoftimit se brenda ambienteve të një lokali në rrugën “Teodor Keko”, një 41-vjeçar kishte plagosur 2 shtetas të tjerë, me mjete prerëse, dhe më pas ishte larguar, menjëherë kanë organizuar punën, me qëllim identifikimin dhe kapjen e tij.
Falë veprimeve të shpejta hetimore, nga specialistët për Hetimin e Krimeve në Komisariatin e Policisë Nr. 6, është bërë identifikimi dhe arrestimi në flagrancë i shtetasit:
– Blerim Gjata, 41 vjeç, banues në Vorë, për veprën penale “Plagosja e rëndë me dashje”.
Ky shtetas, në orët e para të mëngjesit, në një lokal në rrugën “Teodor Keko”, pas një konflikti për motive të dobëta, ka goditur me mjete prerëse, shtetasit E. N., 35 vjeç dhe P. B., 48 vjeç, të cilët ndodhen jashtë rrezikut për jetën.
Materialet i kaluan Prokurorisë, për veprime të mëtejshme procedurale", njofton policia.
