Që nga fillimi i luftës, Rusia ka lëshuar në Ukrainë më shumë se 2 mijë raketa. Deklarata është lëshuar nga presidenti Volodymyr Zelensky, i cili situatën në zonën e fundit të rezistencës në Mariupol, në metalurgjikun Azovstal, e konsideroi një ferr në tokë.
“Aktualisht, sulmet dhe bombardimet e Rusisë në Azovstal nuk po ndalojnë. Por ende duhet të nxirren civilët, gratë dhe fëmijët. Aty mbetën shumë fëmijë. Vetëm imagjinoni këtë ferr! Aty ka fëmijë! Më shumë se dy muaj sulme të vazhdueshme, bombardime, vdekje të vazhdueshme aty pranë”, tha Zelensky.
Presidenti shtoi se operacionet e shpëtimit nga Mariupoli po vijojnë me ndihmën e Kombeve të Bashkuara dhe Komitetit Ndërkombëtar të Kryqit të Kuq. Ndërsa nga ana tjetër, Rusia pretendon se është ushtria e saj që po mundëson largimin e civilëve nga metalurgjiku Azovstal. Sakaq, bombardimet nuk kanë ndaluar as në zona të tjera. Shpërthime të fuqishme janë raportuar në rajonin verior të Ukrainës, Kherson dhe në atë të Mykolaiv, në jug të vendit.
