Të enjten, këngëtari britanik publikoi videoklipin për këngën, të cilën e xhiroi në vendin e shkatërruar nga lufta para pushtimit të Rusisë.
Klipi shfaq këngëtarin me kapuç gri dhe pallto të zezë duke kënduar në mes të kërcimtarëve në rrugët e Kievit para fillimit të luftës. Në fillim të këngës shfaqen disa titra ku Ed tregon se para agresionit rus ai kishte zgjedhur kryeqytetin ukrainas për të xhiruar këngën e tij.
Të gjitha përfitimet dhe të ardhurat për këngën janë caktuar për tu dërguar në fondacionin “DEC’s Ukraine Humanitarian Appeal”.
“Kam filmuar videon për ‘2step’ në qytetin e Kievit, Ukrainë përpara se të fillonin të ndodhnin aktet shkatërruese të luftës,” tha Sheeran në një deklaratë.
“Ishte hera ime e parë që vizitoja vendin dhe u ndjeva shumë i mirëpritur gjatë qëndrimit tim atje – të gjithë duke nisur nga grupi i xhirimit deri te njerëzit e shumtë që takova gjatë ditëve të mia të pushimit.”
Sheeran vazhdon: “Ukraina është një vend krenar dhe heroik, jam mirënjohës që pata rastin të filmoj videon time atje. Unë jam me Ukrainën.”
Sheeran kishte disa kohë që e aludonte bashkëpunimin e tij me Lil Baby. “Kam qenë një fans i madh i @lilbaby për një kohë tani, shumë i emocionuar që e kam pjesë në remix-in e kësaj kënge” shkroi Sheeran në Instagram. “Është një nder, shpresoj që të gjithë ta shijojnë, 22 Prill, surpriza të tjera do të vijnë pas kësaj.”
