Merushe Hazizi, 30-vjeçarja e cila u vra mizorisht një ditë më parë nga vjehrri i saj, është përcjellë sot për në banesën e fundit. E reja, nënë e 3 fëmijëve, do të prehet në varrezat pranë familjes së saj. Ngjarja makabre ka ndodhur këtë të martë. Hazizi kishte pasur një lidhje tjetër martesore më parë, nga e cila solli në jetë 3 fëmijët të cilët i mban burri i parë. Kjo mendohet se ka qenë arsyeja e refuzimit të kësaj martese nga babai i djalit, Xhevair Hoxha. Prej tre vjetësh, ata kishin debate të vazhdueshme deri sa dje 61-vjeçari e masakroi me thikë 30-vjeçaren në tualetin e banesën e tyre në fshatin Vidhisht të Roskovecit. Pasi kreu krimin, ai u vetëvar në një pemë që ndodhej në pjesën e pasme të shtëpisë.
30-vjecarja Hazizi është përcjellë për në varrezat e fshatit nga familjaret e saj, jashtë syrit të medias. Po në të njëjtin orar, në fshatin Vidhishte u mbajt dhe ceremonia mortore e Xhevair Hoxhës. Në shtëpinë e autorit, aty ku ndodhi edhe ngjarja e rëndë, ka kapluar qetësia, ndërsa nuk ndodhen shumë njerëz në ceremoninë mortore.
