Vetëm pak ditë pasi u ekstradua nga Italia, pasi ishte shpallur në kërkim për vrasjen e dy vëllezërve në Vlorë, Beqir dhe Elmaz Hashon në vitin 1998, 47-vjeçari Gerti Selimaj është lënë i lirë nga Gjykata e Vlorës. Pas vrasjes, famija Hasho kërkonte zbardhjen e ngjarjes, ndërkohë që pak kohë më parë, si autor i kësaj ngjarjeje u arrestua Selimaj. Por burgosja e tij zgjati shumë pak pasi në datën 28 mars, gjykata e Shkallës së Parë në Vlorë, ka caktuar masën e sigurisë ‘arrest në shtëpi’, duke shuar masën ‘arrest me burg’. Ky vendim ka shkaktuar indinjatë te familjarët, të cilët e kanë ankimuar në Gjykatën e Apelit, duke e quajtur të paarsyetuar. Sipas tyre me një fjalë, gjyqtarja ka liruar një të dyshuar për vrasje me paramendim.
Në këto kushte, familjarët kërkojnë që të verifikohet ankesa e tyre dhe të merren masat e nevojshme kundër gjyqtares.
"Si mund të lihet i lirë një vrasës që ka kryer vrasje të dyfishtë. Kemi 20 vjet që po presim këtë drejtësi dhe gjykata e lë në arrest shtëpia. Duhet ta kthej shteti në burg”, tha për mediat djali i Elmaz Hashos, Xhuliano.
“Unë jam gruaja e Beqir Hashos. Besoja te drejtësia dhe drejtësisë shqiptare i kërkova që të zbardhet çështja. Mos na vrisni për herë të dytë”, tha gruaja e Beqir Hashos, Mimoza Hasho.
Një muaj më parë, Selimaj u shpall në kërkim ndërkombëtar pasi Gjykata e Rrethit Gjyqësor Vlorë caktoi masën e sigurimit “Arrest në burg”, për veprat penale “Vrasja me paramendim” dhe “Prodhimi dhe mbajtja pa leje e armëve luftarake dhe e municionit”. Selimaj u arrestua më 12 mars në Itali, ku u kap në një apartament në zonën e Martina Franca për llogari të drejtësisë shqiptare, 23 vite pas vrasjes së dy vëllezërve në Vlorë, Beqir dhe Elmaz Hashon. Më pas u ekstradua në vendin tonë.
