Ministrja e Financave dhe Ekonomisë Delina Ibrahimaj ka dalë në një konferencë për shtyp duke bërë një analizë të situatës së deritanishme në Shqipëri, teksa vendi ynë po përballet me fenomenin e rritjes së çmimeve. Ibrahimaj ka bërë të ditur se Bordi i Ushqimeve po mban nën kontroll çmimin e 4 ushqimeve kryesore të shportës.
Ministrja është shprehur se në mbledhjen e datës 1 prill, bordi vendosi që të mbajë në monitorim katër produkte kryesore, miellin, orizin, vajin dhe sheqerin, për të cilat sot do të bëjë të ditur çmimet e referencës. Ministrja tha se është përcaktuar formula për të caktuar marzhin e fitimit.
“Ne kemi ngritur bordin e monitorimit të transparencës, ndryshe nga Bordi i Karburanteve, Bordi i Ushqimeve ka një tjetër specifikë, se ka një tjetër kategori ushqimesh, kjo ka bërë që gjatë blerjeve të para kemi hasur vështirësi, do të mbajmë në montorim çmimet për miellin, vajin e lulediellit. Kompanitë duhet të aplikojnë disa marzhe, sot do të dalin edhe çmime reference për miellin, orizin, vajin dhe sheqerin”,-tha ministrja.
