Prej 19 marsit në Shqipëri është konfirmuar prezenca e gripit të shpendëve në vendin tonë. Procesi i groposjes ka nisur dhe është në vijim në Durrës, ndërsa Autoriteti Kombëtar i Ushqimit (AKU) konfirmon se janë konfiskuar vezët e pakta që janë prodhuar pas datës 19 mars. AKU po ashtu njofton se ka zbarkuar në terren me inspektime, por shitësit në tregje të ndryshme mohojnë të jenë kontrolluar.
Deri më tani janë 120 mije pula të infektuara të gjalla që pritet të asgjësohen. Ndërkohë gjysmë milioni pula të ngordhura janë groposur deri tani, pas përhapjes së gripit të shpendëve, i cili preku tre pularitë më të mëdha të vendit. Ministrja e Bujqësisë u kërkon të gjithë pula-rritësve apo dhe stabilimente të pularive të qëndrojnë në kontakt me shërbimin veterinar nëse konstatojnë ngordhje të shpendëve të tyre.
