Autori i vrasjes së katërfishtë të çiftit shqiptar dhe dy fëmijëve të tyre të mitur është ende i paidentifikuar dhe i pakapur nga policia greke. Oficerët e policisë kanë hedhur poshtë dy nga skenaret e menduar fillimisht, atë të cilin babai Gjergji ka dashur t'i marrë jetën nënës Marisë dhe dy fëmijëve të tyre dhe skenarin e dytë ku vrasësi mund të ishte ish-bashkëshorti i nënës së vrarë. Sipas hetimeve, ai ka një alibi për natën e krimit, por megjithatë do të udhëtojë drejt Andravidas pasi i mbijetuari i vetëm i familjes, 12-vjeçari që gjeti familjen e pajetë është djali i tij nga martesa e mëparshme. Një tjetër mundësi që policia po shqyrton është vrasja e paramenduar nga një person me të cilin çifti kishte pasur grindje në të shkuarën. Autoritetet po presin për dëshminë e 12-vjeçarit, por mësohet se ai është në gjendje shumë të rënduar psikologjike.
Media greke Protothema, duke iu referuar grupit hetimor, shkruan se autori ende i pazbuluar ka pasur qëllim zhdukjen e trupave, por nuk ka arritur të përfundojë planin e tij pasi duket se diçka e ka trembur dhe ka ikur, ndoshta hyrja në banesë e 12-vjeçarit. Kjo u zbulua pasi trupat e prindërve janë gjetur në depon e shtëpisë, ndërsa fëmija 3-vjeçar është gjetur në dysheme, pranë tyre. Fëmija tjetër 2 vjeç është gjetur i pajetë nga vëllai, i cili e ka tërhequr deri në rrugë ku ka bërtitur e të madhe për të kërkuar ndihmë.
Në brendësi të shtëpisë janë gjetur edhe njolla gjaku të shpërndara, ndërsa plagët e shkaktuara në trupat e burrit dhe gruas janë të shkaktuara me armë zjarri.
