Koalicioni opozitar 'Shtëpia e Lirisë' ka prezantuar këtë të shtunë kandidatin për kryetar bashkie në Shkodër, Bardh Spahia. Kandidati përfaqësues i zgjedhjeve të 6 marsit, gjatë fjalimit të tij theksoi se dera e bashkisë do të jetë gjithmonë e hapur për qytetarët shkodranë dhe se ka ardhur koha që Shkodra të mos vuajë më diskriminim politik.
Spahia gjithashtu ka hedhur akuza të forta ndaj Lulzim Bashës duke thënë se ai nuk përfaqëson demokratët, por shet vlerat dhe kontributet e tyre për qëllime personale dhe për t'u pasuruar. Kandidati për Shkodrën tha se PD nuk i përket humbësve kronikë, ndërsa u kërkoi votën demokratëve për të treguar se partia u përket atyre dhe jo Bashës që mban zyrat me forcë.
