Voltana Ademi është tërhequr nga gara për kryetare të bashkisë Shkodër. Mësohet se ajo nuk do të kandidojë në zgjedhjet e pjesshme vendore që do të mbahen me 6 Mars. Ademi ka konfirmuar lajmin me anë të një deklarate ku jep edhe arsyet e tërheqjes nga gara.
"Unë jam kryetarja në detyrë e Bashkisë së Shkodrës. Për shkak të këtij pozicioni, të pozicioneve të mëparshme publike që më janë besuar por edhe për shkak të angazhimit tim dhjetëravjeçar në Partinë Demokratike, kam vendosur të mos marr pjesë në "primaret" që do të zhvillohen me 30 janar 2022 për përcaktimin e kandidatit për kryetar bashkie në Shkodër. Gjykoj se futem në garë me një avantazh përballë të gjithë kolegëve të tjerë, për arsyet që përmenda më sipër. Unë jam në mbështetje të çdo demokrati, të strukturave ndaj të cilave unë ndjehem e detyruar për vlerësimin në vijimësi. Voltana Ademi nuk i shmanget asnjë sfide, por brenda familjes sonë politike, duhet të jemi të gjithë të barabartë në mes të barabartëve, të kemi mundësitë dhe hapësirat tona për të dhënë kontribut për PD- në, Shkodrën e Shqipërinë", shkruan ndër të tjera Ademi.
Kujtojmë se Ademi është shfaqur së fundi krah lëvizjes së ish-kryeministrit Sali Berisha.
