Për të justifikuar nofkën raciste “konviktorë” e cila shënjon studentët që banojnë në Qytetin Studenti, Erion Veliaj përmendi Platonin. Sipas tij, Platoni paskësh thënë që kush nuk merr pjesë në politikë është idiot. Në fakt Platoni s’e ka thënë asgjëkund diçka të tillë pasi, kush ka minimumin e njohurive politike e di mirë se, ai ishte për një politikë aristokratike, ku të drejtën e vendimmarrjes do ta kishte vetëm sëra e zgjedhur e filozofëve, jo demosi. Po që Erion Veliaj është injorant ka qenë e kuptueshme edhe përpara kësaj mufke – mjafton të lexosh fjalitë e tij të varfra në leksik, budallaqe në përmbajtje dhe plot emoji.
Lexo me tej:
E rëndësishme në këtë rast është se Veliaj është mishërim i pushtetarit që qeveris për të pasuruar veten dhe ortakët e tij oligarkë. Dhe meqë jemi te Platoni, për këtë të fundit shteti oligarkik “nuk është një, por dy, ai i të varfërve dhe ai i të pasurve, që banojnë në të njëjtin vend dhe komplotojnë vazhdimisht njëra palë kundër palës tjetër.”
Fatkeqësisht Platoni nuk ka plotësisht të drejtë pasi në oligarkinë bashkëkohore të Ramës, Veliajt, ndërtuesve të kullave dhe uzurpuesve të publikes, i vetmi komplot është ai i të pasurve kundër të varfërve. Të parët, të pangopur me vjedhjen dhe shfrytëzimin e të dytëve, gjejnë kohë edhe t’i përçmojnë si “konviktorë” e “katundarë”.
Kjo do të vazhdojë deri ditën kur ne – shumësia e paanë e njerëzve të nëpërkëmbur – të zëmë hunjtë e sfurqet, si në Athinën e moçme, për të dëbuar oligarkët dhe vendosur demokracinë.
Marre nga Facebook i autorit Arlind Qori
