Bota e modës ka humbur një ikonë. André Leon Talley, ish-redaktor dhe drejtor kreativ i Vogue ka vdekur në moshën 73.
Talley thuhet se vdiq të martën në një spital në “White Plains”, New York. Nuk dihet ende se për çfarë ishte shtruar në spital.
Vizioni i Talley ndihmoi në transformimin e “Vogue” në vitet ’80 dhe ’90 ndërsa ai u ngjit në revistë për t’u bërë përfundimisht drejtor lajmesh, një pozicion që e mbajti nga viti 1983 deri në 1987, përpara se të merrte rolin e drejtorit kreativ të “Vogue” në 1988.
Talley më vonë u bë kryeredaktor në revistë dhe punoi pa pushim për “Vogue” derisa u largua nga publikimi në 2013. Edhe pasi u largua nga kompania, Talley vazhdoi të kontribuonte aty dhe u shfaq në disa podcast-e për publikimin.
Talley nuk shihej vetëm si një ikonë e modës për veshjet e tij të pakrahasueshme, por edhe për barrierat që ai theu në revistë dhe gjetkë në pistat e botës duke i shtyrë dizajnerët kryesorë që të kishin më shumë modele me ngjyrë në shfaqjet e tyre. Gazetari i modës gjithashtu këshilloi veçanërisht familjen Obama gjatë kohës së tyre në Shtëpinë e Bardhë, ku ai prezantoi Michelle Obama me stilistin tajvanezo-kanadez Jason Wu, i cili dizajnoi fustanin e saj inaugurues.
