34-vjeçari Vinçens Piroli, të cilit iu bë atentat mbrëmjen e djeshme në Shkodër, është ndaluar në Spitalin e Traumës, pasi ndaj tij ishte lëshuar një urdhër-arresti ndërkombëtar. Piroli, i kërkuar nga autoritete për vrasje, ka qenë duke lëvizur në këmbë teksa është qëlluar me pistoletë me silenciator në gjoks dhe në bark. Pasi është qëlluar me dy plumba Piroli ka telefonuar familjen e tij dhe iu ka kërkuar që të bëjnë kujdes.
Më pas një i njohuri i 34-vjeçarit ka marrë makinën e kushëririt të Pirolit dhe e ka dërguar në spitalin e Lezhës, pasi në spitalin e Shkodrës i riu ka patur frikë.
I plagosur Piroli është dërguar më pas në Spitalin e Traumës në Tiranë, ku dhe ndodhet jashtë rreziku për jetën.
