Këtë të shtunë, në të gjitha degët e Partisë Demokratike u zhvillua referendumi për shkarkimin e kryetarit, Lulzim Basha. Me logo dhe vulë të re, fleta e votimit i dha dy mundësi demokratëve, të konfirmojnë ose jo, largimin e kryedemokratit. Në tërësi procesi ka qenë i qetë, por nuk kanë munguar incidentet në disa qendra votimi.
Në disa degë të partisë Demokratike votimi është zhvilluar në kushte të pazakonta, pasi që në nisje të procesit mbështetësit e Berishës kanë denoncuar ndërrimin e bravave të dyerve të selisë së PD. Anëtarët e PD-së në Sarandë kanë votuar në rrugë, pasi dera e selisë së Partisë Demokratike ishte e mbyllur. Në Delvinë ka pasur disa përplasje duke sjellë bllokim të procesit, teksa e njëjta situatë është vërejtur edhe në Cakran pasi policia ka nxjerrë materialet zgjedhore në rrugë.
Problematika janë hasur edhe në kryeqytet, pasi deputeti Belind Këlliçi ka denoncuar personalisht një rast në selinë numër 1, ku sipas tij mbështetës të Bashës kanë hedhur vaj nëpër shkallë për të penguar procesin. Po ashtu, raportohet se disa nga anëtarët e partisë nuk kanë gjetur dot emrat në listat zgjedhore.
