Një 29-vjeçar ka mbetur i vrarë pas konfliktit të ndodhur pak minuta pas mesnate në rrugën “Irfan Tomini” në Tiranë. Mësohet se pas mesnate është qëlluar me armë zjarri dhe për pasojë edhe ka ndërruar jetë 29-vjeçari Jurgen Duka (Mëziri). Viktima bashkë me shokun e tij, O. D. kanë hyrë në një market dhe pas një debati kanë nisur një konflikt me një person tjetër të pa identifikuar. Ky i fundit ka qëlluar me armë. Sipas policisë, nga verifikimet e kryera rezulton se viktima është person me precedent të mëparshëm kriminal.
Grupi hetimor ka sekuestruar prova materiale që shërbejnë për të identifikuar autorin e ngjarjes. Për zbardhjen e situatës janë marrë në pyetje shoku i viktimës dhe persona të tjerë në vendngjarje.
