Fotografi të jashtëzakonshme të papublikuara ndonjëherë, të realizuara nga një ushtar gjerman gjatë Luftës së Dytë Botërore janë shfaqur për herë të parë pasi dolën në një ankand online.
Seti prej 59 fotografish private, bardh e zi të realizuara mes 2-13 shtatorit 1944, tregon ushtarët gjermanë gjatë Kryengritjes së Varshavës, e njohur si rezistenca më e madhe kundër forcave naziste gjatë gjithë luftës.
Fotot e bëra në vijën e frontit të ushtarëve nazistë të rrethuar, nuk do të ishin publikuar kurrë në atë kohë, pasi ato mund të konsideroheshin të dëmshme për makinën propagandistike naziste.
Kryengritja e Varshavës filloi më 1 gusht 1944 dhe zgjati deri më 2 tetor 1944 kur vetë Adolf Hitler urdhëroi shkatërrimin e plotë të qytetit.
Kur forcat naziste kishin shkatërruar më shumë se 80% të qytetit, rreth 18 mijë polakë kishin humbur jetën në betejën 63-ditore.
Jan Ołdakowski, drejtori i Muzeut të Varshavës tha se "këto foto janë marrë nga një perspektivë private dhe se kjo është arsyeja pse ato janë kaq të vlefshme".
"Mund të shihni se rekomandimet se si duheshin fotografuar ushtarët gjermanë nuk vlejnë në këtë rast. Aty ata shihen të ngathët, të pistë dhe të ulur në pozicione që nuk do t'i pëlqenin shefat e tyre.
Një ushtar gjerman nuk mund të tregonte në fotot e tij një tjetër ushtar gjerman që kishte uniformën e zbërthyer, ose që ishte i lodhur. Gjermanët u siguruan që imazhi i ushtarëve të tyre të ishte ai i një ushtrie fitimtare, të uniformuar dhe të mirë” – shtoi ai.
Fotot e përshkruara nga historianët si "historikisht të paçmuara" u zbuluan së fundmi nga stafi në Muzeun Rising të Varshavës pasi u nxorën në shitje në një faqe ankandi interneti.
Pronari, një shitës librash antikuar në Republikën Çeke, pranoi t'ia shiste muzeut për 2000 paund nëse i merrte paratë brenda 48 orëve.
Identiteti i ushtarit që bëri fotot mbetet një mister. Historiani Ryszard Mączewski thotë se ai “mund të ketë qenë një ushtar i Batalionit të Radios 302, sepse armët e përdorura nga ushtarët e asaj njësie janë të dukshme në fotografi”. ©LAPSI.al
