Koreja e Veriut ka dënuar me vdekje një burrë që shiste kopje të serialit "Squid Game", në mënyrë të paligjshme. Autoritetet kapën shtatë nxënës të shkollave të mesme duke parë hitin global në gjuhën koreane.
Kontrabandisti thuhet se ka sjellë një kopje të Squid Game në Korenë e Veriut nga Kina dhe ka shitur disqe USB që përmbajnë serialin. Burimet thanë se dënimi i tij do të kryhet me pushkatim.
Një student që bleu një kopje u dënua me burgim të përjetshëm, ndërsa gjashtë të tjerë që ndoqën serialin janë dënuar me pesë vjet punë të rëndë, dhe mësuesit dhe administratorët e shkollave janë pushuar nga puna, duke u përballur me dëbim për të punuar në miniera të largëta, thanë burimet.
Arrestimi i shtatë studentëve shënon herën e parë që qeveria po zbaton ligjin e sapo miratuar për “Eleminimin e Mendimit dhe Kulturës Reaksionare”, në një rast që përfshin të mitur, sipas burimit.
Ligji, i shpallur vitin e kaluar, parashikon një dënim maksimal me vdekje për shikimin, mbajtjen ose shpërndarjen e mediave nga vendet kapitaliste, veçanërisht nga Koreja e Jugut dhe SHBA.
