Në një prononcim për mediat nga selia e Partisë Demokratike, sekretari i përgjithshëm Gazment Bardhi bëri sërish thirrje që mbledhja e Kuvendit Kombëtar të bëhet duke respektuar procedurën dhe statutin e partisë. Bardhi sërish apeloi ish kryeministrin Berisha që firmat, nëse i ka, t’i dorëzojë në protokollin e selisë blu dhe jo në zyrën e Palokës.
"Edhe sikur të jetë arritur të sigurohet 1/8 e firmave të delegatëve, vullneti i tyre nuk duhet mbyllur në kasafortë. Edhe nëse 1/10 e delegatëeve të kuvendit kanë nënshkruar, atëherë zëri i tyre duhet të dëgjohet. Prandaj dua të përsëris thirrjen time, nxirrni firmat nga kasaforta, mos bëni shoë me gazetarët të cilët nuk mund të verifikojnë nëse ata që kanë firmosur janë anëtarë të PD apo delegatë, apo janë apo jo gjallë. Dorëzoni kërkesën në protokollin e PD, respektoni institucionet e PD dhe i lini demokratët të shprehin vullnetin e tyre të lirë. Kjo parti është krenari e demokratëve, ne nuk veprojmë në ilegalitet. Është krenari e Shqipërisë PD-ja dhe nuk mund të tallet askush me të. Rregullat janë të qarta, të dërgohet kërkesa, të mblidhen institucionet dhe të dëgjohet edhe zëri qoftë pakica e pakicës. Partia nuk është kasafortë, nuk është bunker. Ne nuk jemi celulë ilegale, por veprojmë në përputhje me rregullat e shtetit dhe të Partisë Demokratike”, nënvizoi Bardhi.
