Në nder të 76-vjetorit të themelimit të Organizatës së Kombeve të Bashkuara është mbajtur një ceremoni memorandumi për bashkëpunimin e kësaj organizate me Shqipërinë. Gjatë kësaj ceremonie, fjalën e ka marrë edhe zv. Kryeministri Arben Ahmetaj i cili ka theksuar se vendi ynë ka zbatuar dhe do të vijojë të ndjekë me përpikmëri platformën e Kombeve të Bashkuar, sidomos pas nënshkrimit të marrëveshjes së re të bashkëpunimit 2022-2026.
Ahmetaj tha se në vitet e fundit Shqipëria ka punuar shumë për të ulur nivelin e varfërisë dhe se ia ka dalë më mirë se shumë vende të tjera. Zv.kryeministri po ashtu theksoi se nëse progresi vijon me këto ritme 10 vitet e ardhshme, të rinjtë nuk do të duan të largohen më nga vendi ynë.
"Projekti për akademinë e kodimit nuk do kthejë Shqipërinë në vend digjital, por do fusë ambicien që pas 10 vitesh të themi sot Shqipëria ka një rini që nuk tenton të ikë por të garojë me ambicien e vet brenda zhvillimeve të vendit. Të qenit anëtar i BE ngelet ambicia jonë kryesore. Shqipëria e ka ulur varfërinë në raport me vendet e tjera me një shpejtësi shumë më të madhe. Varfëria nuk ulet me fjalë të ngrohta. Të gjitha janë false nëse nuk mbështeten nga reforma intensive. Nuk rri pa përmendur reformën në drejtësi që ka futur elektricitet të rëndësishëm”, u shpreh Ahmetaj.
