Momentet e shumta elegante të Zendaya-s në tapetin e kuq, më në fund janë shpërblyer zyrtarisht.
Këshilli për Dizajnerët e Modës të Amerikës (CFDA) njoftoi të mërkurën se aktorja 25-vjeçare do të marrë çmimin e Ikonës së Modës 2021, duke e bërë atë personazhin më të ri që nderohet me këtë çmim.
“Udhëtimi i Zendaya drejt Fashion Icon ndodhi me shpejtësi supersonike”, shkroi CFDA në Instagram. “Herë pas here, ajo ka dëshmuar se nuk ka frikë të ndërmarrë rreziqe… Me homologun e saj krijues [stilisti prej kohësh Law Roach], #Zendaya u ka dhënë fansave dhe ndjekësve të modës në mbarë botën një numër të madh pamjesh magjepsëse në tapetin e kuq për t'u mbajtur mend.”
Aktorja do t'i bashkohet një liste të mbushur me yje që janë nderuar me çmimin e Ikonës së Modës nga ngjarja e rëndësishme – që konsiderohet si “Oscar i modës” – duke përfshirë Lady Gaga, Beyoncé, Naomi Campbell, Rihanna dhe së fundmi, Jennifer Lopez.
Zendaya është e njohur për stilin e saj të pakrahasueshëm që i bën të gjithë të kthejnë kokën në çdo ngjarje publike ku shfaqet. Mirëpo, nuk ka qenë gjithmonë kështu. Aktorja kujton se në fillimet e saj në Disney, ajo vishte veshje të lira.
"Kur isha 14 vjeçe, në premierën time të parë të filmit, veshjen time e kisha marrë nga Target," tha ajo për InStyle. “Dhe mendova se po fluturoja. Ndihesha shumë ‘cool’.”
Çmimet CFDA 2021 do të mbahen më 10 nëntor.
