Pas komunikimit të djeshëm për shkarkimin e Flamur Nokës nga posti i zv.kryetarit të Komisionit të Sigurisë në Kuvend, Lulzim Basha ka dalë sot me disa akuza të tjera për deputetin demokrat. Nga selia blu, Basha tha se ne nuk mund të mbetemi peng i axhendave personale, sajesave dhe shpifjeve, që duan ta kthejnë PD në një bunker të axhendave personale. Kryedemokrati tha se PD-ja, që ka armik Ramën, nuk mund të përbaltet nga sajesa, shpifje dhe devijime.
“Zotit Noka i kanë komunikuar shkarkimin e tij nga detyra, nuk e kanë përjashtuar por paralajmëruar. Nuk mundet që PD që ka armikun e shqiptarëve Edi Ramën dhe regjimin e tij të mbahet peng nga sajesa shpifje dhe keqinformime që na devijojnë nga detyra jonë. Ne kemi lançuar iniciativa të shumta opozita dhe do të lançojmë të tjera, për të zhbërë dhe gërryer themelet e regjimit Rama-Doshi-Rakipi dhe nuk mund të mbetemi peng i agjendave personale që kërkojnë ta kthejnë PD në një bunker për interesa personale të kujtdo qofshin këto. Prandaj shtrembërime të tilla nuk do të tolerohen”, deklaroi Basha.
